ospite contro man

Ospite contro man
So’ rustegoto, po’ vegno da fora
da ospite vostro asse’ me onora…
Qua son securo, del gran bon evento
incontro tra gente de core contento.

Onore a la casa e la amabil parona
El luogo no ciama parole che stona…
No so’ el poeta, come voaltri credì
Son solo on omo che varda sto dì.

L’amica de Priapo, la me musa botanica
me crede simpioto , ma largo di manica.
Xè anca on po’ vero, me sbrassolo i fiori…
le done on mistero, pensieri e…sudori !

Cossì pian pianelo, deventà a so’ devoto,
de bianco e del moro che impina el me goto.
Le amiche ca gò in olta par el mondo
convinte le xè dal me fare giocondo.

No vojo baruffe o gran confusion
la Dea callipigia metemo in prason !
Qua se godemo sto’ mondo ben belo
na’ fiasca de vin el mejo giojelo.

Arquanti sa dire gran bele parole
on mondo incantà, pieno solo de fole.
El tempo scampa, ghe vedemo i malani
ma svanisse co le rose, l’ardore dei ani.

A mi no me scappa la simpatia
par la Bela Signora de seda vestia!
No so, e no capisso,- del mondo vardo tuto,
ma sempre tra i brassi de le bele done, me buto …

Da veci se sa’ se ga’ tante domande…
Sarala doman, na’ fola pì grande ?
La sola speransa, e de bona compagnia
Siore sapielo, xè la mata utopia.

Par essar concreto e vardare al pan
sa cat-è on poeta, tratelo da can !
Par stare in tajo co ste quatro quartine
andemo a spassarsela soto le bine.

Diseva on gnoco, e lo digo anca mi
No spetemo che spunta on altro dì .
Mejo xe’ sempre la giusta alegria
pitosto che sani e gonfi de nostalghia.

Godemo oncò stà calma belessa
lassemo a le muse la grama tristessa.
Perdemose tuti al scuro del bosco
vardemo la luna e ‘ndemo nel fosso .