ECCELINO

– Sora de tuti, so’ el gran tirano
on pò umanista, ma copo e fo’ dano.
Buttemole in piassa ste quattro strasse
disemosse ciaro, ca’ tirani se nasse…

Quà me rameno e le spose me spasso,
ma no compatisso le teste de casso !
Le rompe i bisi, le confonde, le fà confusion
co le sucche incarnà nessuna rason.-

Qua se inventa balote, le spara stramboti
se vive imbriaghi pieni de goti.
Qua che comanda pare sia el vin,
invesse so’ mi… el FANTASMA ECCELIN !

Xe ora, xe tempo de fare giustissia
mi sfido a duelo chi el Palio smissia…
ghe tajo la testa, po’ anca i cojoni
continuo la festa co’ tuti i paroni…

Da sette sento quarata e pi’ ani
no toco le strasse de sti quatro vilani…
A mi pora anema, porteme respeto!
da vivo so stà omo… ma no maledeto!

Asse so’ devoto ai Santi dei santi, e a chi laora,
ma valtri pagani, no tocheme la Madona de fora.
So’ Eccelin , sta tera d’infamia, mi gò maledeta,
cossì xe folà da nani, lendane, pioci e aria infeta.

Ciamème tirano… cossì parlo forte
ardarò ste piere… portarò peste e morteee!
Del vostro piere e quarei, xe’ la grama festa,
la banda che la comanda ga persa testa.

Sento lironi, le gnacare, l’odore del fogo
so’ mi …la peste, ca stissa sto’ logoooo !
Sareli in tel forno, quei‘ che me ciama tirano,
qua’ massa i pajassi, fà del gran dano.

Quando cà voio, ve fasso scappare
tanti xè i fossi che dovì saltare…
Ve smorso la luce, ve metto al scuro…
spaccheve la succa contra el muro.

Co le ciacole dei siori e i fati dei pitochi
no ghe resta ortighe gnanca par i ochi…
El mondo de oncò in pressia se sveja
cambia de man, cipa el gujelo, se tole la streja.

Attenti sioroti co’ le speculazion
el boja xe’ sconto e sensa paron
a lu ghe comanda la grama piassa
no lassa vivi sioroti par rassa…..

Ti, anema cara…
el fogo intissa, ramena el bronzin
par el me popolo so’ sempre Eccelin…