Muare?

Muare ?

Da quando la poesia xe molesta
Dovere xe scrivare, quel che passa par la testa.

De quel che me zaola par el sarvelo, no lo taso,
lo digo a quei che no se fa menar par el naso.

Par pilustrare, e muare i tirani de qua,
cogne conossare i dani che i fa!

Dedicarse, strumare on gran tempo gramo
par averghe el consenso del popolo sovrano.

Credare che i braj e sguelti, a curare i so’schej
sia bravi e onesti, xe da mona, da cuchi o da putej…

Sti sioroti noeli, cò i struma fa solo luamari
I smissia e i sferuma, po’ i va dentro i punari !

I smarassa el polame, vola le zecche ma anca i penoti
E al fin de la fiera i rancura palanche, “co i so rosegoti!”

Impone on stile de presunsion, sensa la giusta classe,
da orbi e incolti guadagna la fede “ma artisti” se nasse.

Sa, se godemo de sta banda de lazzaroni,
ringraziare dovemo el più furbo dei nani.

Vardando in piassa ghe xe’ arquanto de mejo
Anca se la xe’ la stessa scola … lo stesso colejo.

Compagni dai campi e da le cantine
Tiremose fora con mede quartine.
Muemo la storia de la luamaria
rasemo le suche de la boaria.

calemo doso in piassa, cassemoli fora
via i pioci refati, qua solo gente che laora!

Par ben strumare el cambiamento
Dovemo doprare el sentimento
Ma mi no capisso col male de piassa
Cossa che ghe fassa el nano bocassa!